தொடரும் 

நான் சொல்ல முற்படுகையில்
நீ முகத்தை திருப்பிகொள்வதும்
நீ சொல்ல எத்தனிக்கையில்
உன்னைப் போலவே நானும் நடந்து கொள்வதும்
பழைய அன்பையெல்லாம்
புரட்டிப்பார்த்து புதிய நடைமுறையை
மாற்ற நினைக்கையில்
நீ இயல்பாய் இருப்பதாய்
"உன் கற்பனைக்கு என்னால் பதில் சொல்ல முடியாது "
என நழுவி நகர்வதும்
மூன்றாம் நபரின் உதவியை நாட
முயல்கையில்
"நமக்குள் என்ன நடந்துவிட்டது ?
நடுவர் எதற்கு?
"என சண்டை நீளுமோ
என்ற அச்சத்தில்
பழைய அன்பு தொடராதா?
என்ற ஏக்கத்தில்
எதுவும் நிரந்தரமல்ல
அந்த அன்பு
இந்த கோபம்
அந்த நாட்கள்
இந்த வாழ்வு
எல்லாம் மாறும் 
என சமன் செய்துகொண்டு
உன்னோடு தொடர்கிறேன்
என்  உறவை .